Pinasinayaan ngayong September 11 ang Aurelia C. Solidum Dialysis Center ng Romblon Health Care Systems Inc. sa Barangay Doña Juana, San Agustin, Romblon, na magsisilbing karagdagang pasilidad para sa mga Romblomanong nangangailangan ng dialysis treatment.
Ito na ang ikalawang dialysis center sa lalawigan na magbibigay ng libreng dialysis treatment sa mga kwalipikadong pasyente.
Ayon kay Engr. Sonny Solidum, president ng Romblon Health Care Systems Inc., gagamit ang pasilidad ng state-of-the-art dialysis machines mula sa B. Braun Philippines upang matiyak ang kalidad at kaligtasan ng serbisyong matatanggap ng mga pasyente.
Pinangalanan ang dialysis center bilang parangal kay Aurelia C. Solidum, na mas kilala bilang “Manang Auring,” na inilarawan ng kanyang pamilya bilang isang taong kilala sa pagkabukas-palad at pagtulong sa mga nangangailangan sa kanilang komunidad.
Dumalo sa pagpapasinaya sina Mayor Denon Madrona, Chief of Staff ni Congressman Eleandro Jesus “Budoy” Madrona; San Agustin Mayor Aaron James Madrona; mga opisyal at kawani ng lokal na pamahalaan; mga kinatawan ng B. Braun Philippines at Romblon Health Care Systems Inc., gayundin ang mga alkalde mula sa iba't ibang bayan sa lalawigan.
Sinabi naman ni Denon Madrona na libre ang dialysis treatment sa pasilidad at makikipagtulungan ang tanggapan ni Congressman Budoy Madrona sa mga alkalde upang matulungan ang mga dialysis patient sa kanilang transportasyon mula sa iba't ibang bayan patungo sa center.
Binigyang-diin ni Madrona na ang pagkakaroon ng karagdagang dialysis center ay patunay ng patuloy na pag-unlad ng healthcare system sa Romblon sa pamamagitan ng pagtutulungan ng mga lokal na pamahalaan at pribadong sektor.
