Arestado ang isang 41-anyos na lalaki na umano’y drug personality matapos ang joint buy-bust operation sa Barangay Libertad, Odiongan, Romblon dakong 10:29 kagabi, September 27.
Isinagawa ang operasyon ng Municipal Drug Enforcement Unit (MDEU) ng Odiongan MPS bilang lead unit, katuwang ang Philippine Drug Enforcement Agency (PDEA) Romblon Provincial Office at Romblon Provincial Mobile Force Company (PMFC), sa koordinasyon ng PDEA MIMAROPA.
Ayon sa pulisya, isang undercover operative ang umano’y nakabili sa suspek ng isang heat-sealed transparent plastic sachet na naglalaman ng puting mala-kristal na substansiyang hinihinalang shabu kapalit ng ₱1,000 marked money.
Nang kapkapan ang suspek matapos ang legal na pag-aresto, nakumpiska pa umano ang dalawa pang heat-sealed transparent plastic sachet na naglalaman din ng hinihinalang shabu.
Tinatayang nasa 0.54 gramo ang kabuuang timbang ng nakumpiskang hinihinalang ilegal na droga, na may estimated standard drug price na ₱3,672.
Kasalukuyang nasa kustodiya ng Odiongan MPS ang suspek. Isusumite naman ang mga nakumpiskang sachet sa Romblon Provincial Crime Laboratory Office para sa kaukulang pagsusuri.
Inihahanda laban sa suspek ang kasong paglabag umano sa Sections 5 at 11, Article II ng Republic Act No. 9165, o Comprehensive Dangerous Drugs Act of 2002, para sa referral sa Office of the Prosecutor sa pamamagitan ng inquest proceedings.
