Tinatayang 331 miyembro ng Tricycle Operators and Drivers Associations (TODA) sa bayan ng Odiongan ang tumanggap ng tig-₱5,000 cash relief assistance mula sa Department of Social Welfare and Development (DSWD) MIMAROPA mula September 10 hanggang 11.
Ayon kay Abegail Fetilo ng DSWD Romblon, aabot sa ₱1,655,000 ang kabuuang pondong ilalaan para sa mga benepisyaryo ng ayuda.
Kabilang sa mga tatanggap ang mga miyembro ng TODA na hindi nakasama sa mga naunang batch ng benepisyaryo na nabigyan ng tulong noong April.
Bahagi ang cash assistance ng programa ng administrasyon ni Pangulong Ferdinand R. Marcos Jr. para sa mga manggagawa sa transport sector na naapektuhan ng pagtaas ng presyo ng produktong petrolyo dulot ng tensyon sa Middle East.
Sa pamamagitan ng ayuda, layunin ng pamahalaan na makatulong sa mga tricycle driver sa pagharap sa dagdag na gastusin sa kanilang araw-araw na paghahanapbuhay.
Nagpasalamat naman ang mga benepisyaryo sa DSWD at sa pamahalaan sa ipinagkaloob na tulong, na maaari nilang magamit bilang pandagdag sa pang-araw-araw na pangangailangan at gastusin sa kanilang kabuhayan.
