Muling tiniyak ni Romblon Governor Trina Firmalo-Fabic na may sapat na suplay ng anti-venom ang lalawigan bilang paghahanda sa mga posibleng kaso ng snakebite kasunod ng mga naiuulat na cobra sightings sa iba't ibang lugar sa Romblon.
Sa isang facebook live, sinagot ng gobernador ang tanong ng isang residente tungkol sa kahandaan ng lalawigan sakaling magkaroon ng insidente ng kagat ng makamandag na ahas.
Ayon kay Fabic, nakabili na ang pamahalaang panlalawigan ng anti-venom na nakaimbak sa dalawang pangunahing pampublikong ospital sa lalawigan.
“Nakabili na po kami. Meron tayong anti-venom sa Romblon Provincial Hospital sa Odiongan at sa Romblon District Hospital sa Romblon,” ani Fabic.
Binigyang-diin din ng gobernador na sumailalim na sa pagsasanay ang mga medical professionals sa lalawigan upang matiyak ang tamang pagtugon sa mga kaso ng snakebite.
“May training na rin yung ating mga medical professionals,” dagdag niya.
Sinabi rin ni Fabic na nagsisikap ang pamahalaang panlalawigan na makabili pa ng karagdagang anti-venom upang magkaroon din ng suplay ang iba pang isla sa Romblon.
“We'll try as much as possible na makabili pa ng anti-venom para sa ibang mga isla din,” aniya.
Ang pahayag ng gobernador ay kasunod ng mga ulat ng pagkakakita ng mga cobra sa ilang lugar sa lalawigan, dahilan upang paigtingin ng pamahalaang panlalawigan ang paghahanda ng mga pasilidad pangkalusugan para sa anumang emergency na may kaugnayan sa kagat ng makamandag na ahas.
