Agad na nagpaabot ng tulong ang mga lokal na kontraktor sa Romblon sa ilang bayan na naapektuhan ng malakas na pag-ulan at pagbaha na dulot ng Habagat noong nakaraang linggo.
Sa pamamagitan ng Unified Romblon Contractors Association, nagsagawa ng iba’t ibang intervention ang mga miyembro nito upang makatulong sa clearing operations, paglilinis ng mga daluyan ng tubig at iba pang kinakailangang gawain sa mga komunidad na naapektuhan ng sama ng panahon.
Kabilang dito ang Anthony G. Enore Construction and Trading Corp., na tumulong sa clearing operations sa Santa Fe upang alisin ang mga debris at iba pang nakaharang sa mga kalsada na naging dahilan ng paghihirap sa pagdaan ng mga residente matapos ang malakas na pag-ulan.
Samantala, nagpaabot din ng tulong ang Tablas Construction Corporation sa Alcantara, bilang bahagi ng pagtutulungan ng mga lokal na kontraktor at pamahalaan sa pagtugon sa epekto ng pagbaha.
Tumulong naman ang SIM Construction, Trading and Services sa desilting operation sa Barangay San Isidro, Alcantara, upang maalis ang naipong putik, buhangin at iba pang materyales na maaaring humarang sa maayos na daloy ng tubig.
Ayon sa grupo, bahagi ng kanilang pagtugon ang paggamit ng kanilang mga kagamitan at manpower upang mapabilis ang clearing at recovery efforts sa mga lugar na nangangailangan ng agarang tulong.
Ang Unified Romblon Contractors Association ay binubuo ng mga lokal na contractor sa lalawigan na nagsasagawa ng mga construction at development projects sa iba’t ibang bahagi ng Romblon.
Sa pamamagitan ng kanilang pakikilahok sa mga operasyon matapos ang kalamidad, ipinakita ng mga lokal na kontraktor na maaari nilang gamitin hindi lamang ang kanilang kagamitan at technical expertise para sa mga proyekto, kundi maging ang kanilang resources upang makatulong sa mga komunidad sa panahon ng pangangailangan.
Ayon sa grupo, magpapatuloy ang koordinasyon nila sa lokal na pamahalaan at iba pang ahensya upang makatulong sa mga kinakailangang clearing, rehabilitation at recovery activities sa mga lugar na naapektuhan ng malakas na pag-ulan at pagbaha.
Discussion about this post