Ginawaran ng Philippine Coast Guard si Cajidiocan Mayor Marvin Ramos ng PCGA Search and Rescue Medal and Ribbon bilang pagkilala sa kanyang mahalagang ambag sa isinagawang search and rescue operation kaugnay ng insidente ng motor yacht na “Jason.”
Batay sa General Orders No. 191-A na inilabas ng Headquarters Coast Guard District Southern Tagalog noong July 21, 2026, kinilala si Ramos, na isang Auxiliary Commander ng PCGA, dahil sa maagap niyang pagpapakilos sa speed boat ng Lokal na Pamahalaan ng Cajidiocan upang suportahan ang emergency response sa naturang insidente.
Ayon sa kautusan, malaki ang naitulong ng mabilis na pagtugon, epektibong koordinasyon, at dedikasyon ni Ramos sa matagumpay na pagsasagawa ng maritime search and rescue operations, na nagbigay-proteksyon sa buhay at ari-arian at nag-ambag sa tagumpay ng rescue mission ng Philippine Coast Guard.
Nakapaloob din sa pagkilala ang kanyang huwarang paglilingkod, pagiging bukas-palad sa serbisyo, at matatag na pagtupad sa mga adhikain ng Philippine Coast Guard, na nagbigay ng karangalan sa organisasyon at nagsilbing halimbawa ng mahusay na boluntaryong paglilingkod.
Discussion about this post