Pormal nang nilagdaan noong Agosto 13 ang Memorandum of Understanding (MOU) sa pagitan ng Maritime Industry Authority (MARINA) at Lokal na Pamahalaan ng San Agustin para sa pagtatatag ng MARINA Region IV Satellite Office sa bayan.
Lumagda sa kasunduan sina MARINA Administrator Sonia B. Malaluan at San Agustin Mayor Aaron C. Madrona, sa suporta ni Congressman Eleandro Jesus F. Madrona ng Lone District ng Romblon.
“We anchor our service through partnerships,” ani Malaluan sa isinagawang signing ceremony.
Inaasahang magiging available sa publiko ang satellite office pagsapit ng Setyembre 2026, na maglalapit sa mga serbisyo at regulatory functions ng MARINA sa mga may-ari at operator ng sasakyang pandagat, seafarers, pasahero at iba pang maritime stakeholders sa San Agustin at mga karatig na komunidad.
Sa pamamagitan nito, mababawasan ang pangangailangan ng mga residente at maritime stakeholders na bumiyahe pa sa malalayong tanggapan ng MARINA para lamang makakuha ng mga kinakailangang serbisyo.
Inaasahang makatutulong ang satellite office sa pagpapabilis at pagpapalawak ng access sa maritime regulatory services, maritime safety, regulatory compliance at iba pang assistance para sa mga island at coastal communities sa lalawigan.
Itinuturing ang partnership bilang hakbang tungo sa mas accessible, responsive at people-centered na maritime governance sa Romblon.
