Magpapaabot ng tulong ang Lokal na Pamahalaan ng Cajidiocan sa isang residenteng nasunugan sa Barangay Cambajao, kabilang ang ₱10,000 cash assistance, mga materyales pambahay, damit at family kit.
Ayon kay Mayor Marvin “Greggy” Ramos, nakatakdang ipamahagi ng lokal na pamahalaan ang assistance sa Lunes, Agosto 17, bilang agarang suporta sa pamilyang naapektuhan ng sunog.
“Kinakalungkot natin ang pangyayari. Sa Lunes ay magpapaabot po tayo ng tulong, mga materyales pambahay, clothing and family kit at magpapabigay din po tayo ng cash na ₱10,000,” ani Ramos.
Nasunog ang bahay sa Barangay Cambajao bandang alas-7:30 ng gabi noong Agosto 14. Agad na rumesponde ang Bureau of Fire Protection (BFP) Cajidiocan at tuluyang naapula ang apoy bandang alas-8:50 ng gabi.
Walang naiulat na nasaktan o nasawi sa insidente.
Binigyang-diin ni Ramos ang kahalagahan ng pagtutulungan at pagdamay sa mga kababayang nakararanas ng ganitong sitwasyon.
“Sa mga ganitong pagkakataon, napakaimportante ng pagkakaisa at damayan,” ani Ramos.
