Inaprubahan ng House of Representatives sa ikatlo at pinal na pagbasa ang tatlong panukalang batas na naglalayong higit pang mapaunlad ang industriya ng turismo sa lalawigan ng Romblon.
Kabilang sa mga panukalang pangunahing inakda ni Romblon Lone District Rep. Eleandro Jesus “Budoy” Madrona ang House Bill No. 1670, na nagdedeklara sa San Andres bilang isang Tourism Development Area; House Bill No. 1671, na nagdedeklara sa Santa Fe bilang isang Tourism Destination; at House Bill No. 1673, na nagdedeklara sa Suba Cove sa mga barangay ng San Roque, Mangansag, at Mabini sa bayan ng Corcuera bilang isang Ecotourism Destination.
Ayon sa tanggapan ni Madrona, layunin ng mga panukalang batas na magbigay ng malinaw na direksyon sa pagpapaunlad ng mga pangunahing destinasyon sa turismo sa lalawigan.
Inaasahan ding makahihikayat ang mga panukala ng mas maraming pamumuhunan, makalilikha ng karagdagang kabuhayan at oportunidad sa trabaho para sa mga lokal na komunidad, at higit pang maipapakilala ang likas na yaman at mga destinasyon ng Romblon sa mga lokal at dayuhang turista.
Kapag naisabatas, magsisilbi ring batayan ang mga deklarasyong ito sa pagbuo ng mga tourism development plan at sa mas malawak na koordinasyon ng mga lokal na pamahalaan at mga kaukulang ahensya sa pagsusulong ng sustainable tourism sa mga nasabing lugar.
Bago tuluyang maging batas ang mga panukala, kailangan pa itong pag-aralan at aprubahan ng Senado. Kung magkakaroon ng magkaibang bersyon ang dalawang kapulungan, daraan pa ito sa bicameral conference committee bago isumite sa Pangulo para sa kanyang lagda.
