Walang naitalang nasugatan o nasawi matapos na ligtas na makalangoy pabalik sa dalampasigan ng Barangay Punta ang walong indibidwal, kabilang ang kapitan at pitong crew members ng LCT “PMI 3,” nang tumaob ang sinasakyang MBCA “John Michael” sa gitna ng malalakas na alon dulot ng Habagat noong gabi ng August 29.
Batay sa imbestigasyon ng Coast Guard Sub-Station Looc at Looc Municipal Police Station, nakasilong noon sa Looc Bay ang LCT “PMI 3” dahil sa masungit na panahon. Gayunman, pumalaot ang mga tripulante patungong bayan upang bumili ng mga probisyon.
Habang pabalik sa kanilang barko, pinasok ng tubig-dagat ang motorbanca dahil sa malalakas na alon hanggang sa tuluyang tumaob.
Matapos ang insidente, agad na nakipag-ugnayan ang mga awtoridad kay Barangay Captain Edificio Gabat upang pansamantalang patuluyin ang walong tripulante sa Barangay Punta Evacuation Center.
Kinabukasan, natagpuan at nahila ang MBCA “John Michael” pabalik sa dalampasigan ng Barangay Agojo.
Naitala ang bahagyang pinsala sa makina, canopy at ilang bahagi ng istruktura ng bangka.
Samantala, matapos ang beripikasyon, sinabi ng Philippine Coast Guard (PCG) na walang kaukulang rehistro at dokumento ang MBCA “John Michael” sa ilalim ng DOTr Memorandum Circular No. 2017-001 o Safety, Security, and Environmental Numbering (SSEN) System.
Dahil dito, nag-isyu ang PCG ng babala at direktiba sa may-ari ng bangka na asikasuhin ang kinakailangang rehistro at dokumento, habang pinaalalahanan ang mga operator na huwag magpatakbo ng mga hindi rehistrado o colorum na sasakyang-dagat.
Patuloy namang pinapaalalahanan ng PCG ang mga vessel operator, kapitan at crew na tiyaking may sapat na probisyon at kinakailangang paghahanda bago pumalaot, lalo na kapag may banta ng masamang panahon.
