Arestado ang apat na indibidwal matapos maaktuhang nangingisda gamit ang air compressor bilang breathing apparatus sa katubigan ng Sitio Maglihi, Barangay Marigondon, Cajidiocan noong gabi ng July 30.
Isinagawa ang operasyon ng pinagsanib na puwersa ng Cajidiocan Municipal Police Station (MPS) at Philippine Coast Guard (PCG)-Cajidiocan bandang alas-9:20 ng gabi.
Ayon sa pulisya, nahuli ang mga suspek habang aktuwal na gumagamit ng air compressor sa pangingisda, na ipinagbabawal sa ilalim ng Municipal Ordinance No. 03-11, Section 67, na nagbabawal sa paggamit ng air compressor bilang breathing apparatus sa pangingisda at iba pang underwater activities sa municipal waters ng Cajidiocan.
Nakumpiska sa operasyon ang isang bangkang pangisda, isang aluminum air tank compressor, isang pares ng flippers, humigit-kumulang 10 kilo ng iba't ibang uri ng isda, at tinatayang 50 metrong hose na pinaniniwalaang ginamit sa ilegal na pangingisda.
Dinala ang apat na suspek at ang mga nakumpiskang ebidensya sa Cajidiocan Municipal Police Station para sa kaukulang dokumentasyon at pagsasampa ng kaso.
Ayon sa Romblon Police Provincial Office, patunay ang matagumpay na operasyon sa patuloy na pagtutulungan ng Philippine National Police, Philippine Coast Guard, at lokal na pamahalaan sa pangangalaga ng yamang-dagat at mahigpit na pagpapatupad ng mga batas sa pangisdaan at pangangalaga sa kalikasan.
Pinuri naman ni Romblon PPO Provincial Director PCOL Rexton F. Sawi ang operating team sa kanilang pagiging mapagmatyag at muling iginiit ang pangako ng PNP na protektahan ang kalikasan at likas na yaman ng lalawigan.
Discussion about this post