Sugatan ang isang 61-anyos na guro matapos itong paulit-ulit na saksakin ng isang lalaki na umano'y nagtangkang gumawa ng acts of lasciviousness sa kanyang 17-anyos na babaeng pamangkin sa tinutuluyan nilang bahay sa Barangay Busay, San Jose, Romblon, madaling araw ng July 29.
Ayon sa ulat ng Romblon Police Provincial Office (RPPO), dakong alas-12:15 ng madaling araw nang magtungo sa himpilan ng San Jose Municipal Police Station (MPS) ang kapitbahay ng mga biktima upang iulat ang insidente. Agad namang rumesponde ang mga pulis, ngunit nauna nang naisugod sa San Jose District Hospital ang 61-anyos na biktima para sa agarang lunas.
Sa paunang imbestigasyon, lumabas na pumasok ang suspek sa bahay sa pamamagitan ng ikalawang palapag at nagtungo sa silid kung saan natutulog ang 17-anyos na dalagita at ang 13-anyos nitong kasama sa bahay. Tinutukan umano ng suspek ng patalim ang menor de edad, inutusang hubarin ang kanyang damit, at tinakot, dahilan upang sumunod ito sa takot.
Ilang sandali pa, narinig ng 61-anyos na guro ang ingay mula sa ikalawang palapag at nang silipin ang silid ay naabutan umano niya ang pangyayari. Humingi siya ng saklolo, ngunit agad siyang nilapitan ng suspek at paulit-ulit na sinaksak sa iba't ibang bahagi ng katawan bago tumakas.
Habang nagsasagawa ng crime scene investigation ang mga pulis, iniulat naman ng isang barangay kagawad bandang alas-12:35 ng madaling araw ang isa pang insidente ilang metro lamang ang layo mula sa unang pinangyarihan. Napag-alamang isang 89-anyos na babae ang umano'y sinakal at paulit-ulit na sinuntok sa mukha ng pinaniniwalaang parehong suspek. Dinala rin ang biktima sa San Jose District Hospital para sa kaukulang gamutan.
Sa isinagawang hot pursuit operation, naaresto ng mga tauhan ng San Jose MPS ang suspek bandang alas-11:15 ng umaga ng Hulyo 29 matapos siyang positibong matukoy ng mga biktima. Siya ay kasalukuyang nasa kustodiya ng pulisya habang isinasagawa ang dokumentasyon at paghahanda ng kaukulang mga kaso.
Ayon pa sa pulisya, lumabas sa beripikasyon sa Crime Information Reporting Analysis System (CIRAS) na ang suspek ay may nauna nang rekord ng kasong Frustrated Homicide in relation to Republic Act No. 7610, na umano'y naganap sa Navotas City noong 2020.
Inihahanda ng mga awtoridad ang pagsasampa ng mga kasong Frustrated Homicide, Acts of Lasciviousness in relation to Republic Act No. 7610, at iba pang kaukulang paglabag laban sa suspek.
