Inihayag ng Romblon Electric Cooperative (ROMELCO) na nagpapatuloy ang paghahanda para sa pagtatayo ng Silum Mini-Hydropower Plant sa Isla ng Sibuyan bilang bahagi ng pangmatagalang plano upang magkaroon ng mas maaasahan at mas matatag na suplay ng kuryente sa isla.
Sa isinagawang Romblon Provincial Energy Crisis Dialogue nitong Hulyo 20, sinabi ni ROMELCO General Manager Engr. Rene M. Fajilagutan na kasalukuyan nang ina-update ang feasibility study ng proyekto matapos maibigay ang service contract noong 2023.
Ayon kay Fajilagutan, obligado ang kooperatiba na makumpleto ang proyekto pagsapit ng 2028 alinsunod sa itinakdang timeline.
Nilinaw rin niya na hindi magiging pabigat sa pananalapi ng ROMELCO ang pagpapatayo ng hydropower plant dahil susuportahan ito ng financing mula sa dalawang bangko na nag-alok na ng term loan.
“This will not burden the cooperative, the ROMELCO, because the repayment of the loan will be derived from the revenue of the project, which is the Silum Mini-Hydropower Plant,” ani Fajilagutan.
Dagdag pa niya, kasalukuyan nang ginagawa ng consultant ang Detailed Engineering Design (DED) ng proyekto, na inaasahang makukumpleto sa ikaapat na quarter ng 2026. Kapag natapos ang engineering design, target ng ROMELCO na simulan ang paunang konstruksyon ng Silum Mini-Hydropower Plant sa 2027.
Samantala, sinabi naman ni Cajidiocan Mayor Marvin “Greggy” Ramos na bagama't naiprisinta na sa mga lokal na pamahalaan ang proyekto at nagkaroon ng konsultasyon, hindi pa aniya lubos na kumbinsido ang kanilang panig sa panukalang pagtatayo ng panibagong mini-hydropower plant.
“Currently, the ROMELCO mentioned that there is already an approved Loan Agreement for the construction of another Mini Hydro in Silum. Are we consulted? Yes. But are we amenable? So far, I think we are not yet convinced,” ani Ramos.
Binigyang-diin din ng alkalde na nasa kamay ng ROMELCO ang kinabukasan ng suplay ng kuryente sa Sibuyan dahil ito ang nangangasiwa sa Cantingas Mini-Hydropower Plant at siyang namamahagi ng kuryente sa mga mamamayan ng isla.
Patuloy namang isinusulong ng ROMELCO ang proyekto bilang bahagi ng layunin nitong mabawasan ang pagdepende sa diesel-fired power generation at magkaroon ng mas matatag at maaasahang suplay ng kuryente sa Sibuyan Island.
