Ipinahayag ng Romblon Electric Cooperative (ROMELCO) na may sapat itong kakayahan at legal na awtoridad upang magtayo at mamahala ng sarili nitong mga power generation facilities bilang bahagi ng pangmatagalang plano upang mapababa ang singil sa kuryente at mapabuti ang serbisyo sa lalawigan.
Sa isinagawang Energy Crisis Dialogue sa Capitol Building nitong Hulyo 20, sinabi ni ROMELCO General Manager Engr. Rene M. Fajilagutan na handa ang kooperatiba na maging mas self-reliant sa suplay ng enerhiya.
“I can say that the cooperative is capable of developing its own power generation facilities,” ani Fajilagutan.
Nilinaw rin niya na pinahihintulutan ng umiiral na batas ang mga electric cooperative na magmay-ari, magpatakbo, at magpanatili ng sariling mga pasilidad sa paglikha ng kuryente.
“Hindi bawal that the electric cooperative can own, operate, and maintain power generation facilities, as provided in the law,” dagdag niya.
Ayon kay Fajilagutan, layunin ng inisyatibang ito na mabigyan ng mas maaasahan at mas abot-kayang serbisyo ang mga miyembro at konsyumer ng ROMELCO. Aniya, nais ng kooperatiba na mailagay sa ilalim ng pagmamay-ari at pamamahala nito ang mga pasilidad sa paglikha ng kuryente upang magkaroon ng mas malaking kontrol sa suplay at gastos sa enerhiya.
Sinabi rin ng general manager na may sapat na kakayahan ang kanilang mga tauhan at pamunuan upang maisakatuparan ang naturang plano.
“Based on the expertise of our men and the leadership, the Board has the capability of doing this, with the end view of reducing the cost of electricity and becoming more reliable compared to diesel,” aniya.
Inaasahan ng ROMELCO na sa pagpapatupad ng naturang plano ay unti-unting mababawasan ang pagdepende sa diesel-fired power generation at magiging mas matatag at episyente ang suplay ng kuryente sa lalawigan ng Romblon.
