Target ng National Power Corporation (NAPOCOR) na madoble ang kapasidad ng mga diesel power plant sa Isla ng Sibuyan pagsapit ng 2029 bilang bahagi ng pangmatagalang plano nitong mapatatag ang suplay ng kuryente sa isla.
Sa isinagawang Romblon Provincial Energy Crisis Dialogue nitong Hulyo 20, sinabi ni NAPOCOR Romblon Plant Manager Engr. Ricky M. Umban na magdadagdag ang ahensya ng dalawang 1.5-megawatt generating sets upang mapalakas ang kapasidad ng Sibuyan Diesel Power Plant.
“Actually, ang plano namin ay magdadala kami ng dalawang 1.5-megawatt gensets. By 2029, magiging doble ang capacity. Hindi pa kasama rito ang capacity ng hydro. Ang gusto talaga ng NPC ay kapag summer, kahit wala ang hydro, mayroon pa ring reserve na gensets,” ani Umban.
Ayon sa NAPOCOR, sa 2026 ay nakatuon muna ang ahensya sa pagpapanumbalik ng operasyon ng Unit 10 (600-kilowatt) at Unit 13 (1,200-kilowatt) ng Sibuyan Diesel Power Plant.
Samantala, mula 2027 hanggang 2028 ay nakatakdang magpadala at magkabit ang NAPOCOR ng karagdagang generating sets mula sa iba pang lalawigan upang maabot ang target na kapasidad bago sumapit ang 2029.
Inamin din ni Umban na isa sa pinakamalaking hamon sa operasyon ng ahensya ay ang paghahatid ng krudo, na nakadepende sa lagay ng panahon, gayundin ang mga line fault, maintenance ng distribution lines, at iba pang emergency na nagiging sanhi ng mga power interruption sa Sibuyan Grid.
Dahil dito, umapela ang NAPOCOR sa Pamahalaang Panlalawigan ng Romblon na tumulong sa pagpapabilis ng transportasyon ng mga karagdagang generator sa oras na maaprubahan ang mga ito upang agad na mapalakas ang suplay ng kuryente sa Sibuyan.
Ayon sa ahensya, layunin ng mga hakbang na ito na matiyak ang sapat na reserbang kuryente, lalo na sa panahon ng tag-init kung kailan mataas ang demand at maaaring bumaba ang produksiyon ng hydropower.
Discussion about this post