Inaasahan ng ilang agricultural vendors sa Romblon na tatalakayin ni Pangulong Ferdinand R. Marcos Jr. sa kanyang ikaapat na State of the Nation Address (SONA) sa Hulyo 27 ang mga hakbang upang mapababa ang presyo ng mga bilihin, mapalawak ang suporta sa sektor ng agrikultura, at maipatupad ang iba pang pangakong makatutulong sa mga mamamayan.
Ayon kay Marco Fabregas, isang agricultural vendor mula sa Odiongan, umaasa siyang ipagpapatuloy ng Pangulo ang pagpapatupad ng mga programang nakatutulong sa mga magsasaka at iba pang sektor.
“Inaasahan ko sa darating na SONA ni Pangulo, ‘yung kanyang pinanganako ay maipatupad at sana marami pa siyang matulungan. Marami na siyang natupad noong nakaraang SONA, ‘yung pagbibigay niya ng mga assistance sa mga mamamayan lalo na sa mahihirap na magsasaka. Kay PBBM, sana marami pa siyang matulungan kagaya naming mga farmers at higit sa lahat, ‘yung mga kaso na isinampa niya na sangkot sa flood control ay maparusahan,” ani Fabregas.
Samantala, sinabi naman ni Roeselyn Antonio ng Barangay Patoo, Odiongan na umaasa siyang mabibigyang-pansin ng Pangulo ang epekto ng mataas na presyo ng mga bilihin at ang kapayapaan sa bansa.
“Sana sa SONA ni PBBM ay mas maging matiwasay na yung mundo, wala nang kaguluhan. ‘Yun talaga ang inaasahan namin. Sana matugunan yung problema sa presyo ng bilihin. Dito sa Odiongan mura ‘yung mga ani dito, pero ‘yung mga galing sa ibang lugar ay mahal talaga. Salamat kay Presidente dahil maraming natulungan, at maraming nabigyan,” aniya.
Para naman kay Judy Fadero ng Barangay Anahao, mahalagang matugunan ang isyu ng pension para sa mga senior citizen at maipagpatuloy ang pagtupad sa mga naipangakong programa ng administrasyon.
“Ang akin lang po ay sana ‘yung mga senior na makakatanggap na ng pension ay makatanggap na, kasi ‘yung iba 65 na pero hindi pa rin nakakatanggap. Pinapaabot ko po kay PBBM. At yung mga pinangako niya, yung iba natupad, yung iba ay parang hindi pa po. Sana ay matupad po,” sabi ni Fadero.
Inaasahang ihahatid ni Pangulong Marcos ang kanyang ikaapat na SONA sa Lunes, Hulyo 27, kung saan ilalahad niya ang mga naging nagawa ng administrasyon at mga prayoridad na programa para sa nalalabing bahagi ng kanyang termino.
