Pinalawig ng Energy Regulatory Commission (ERC) hanggang Oktubre 2026 ang pagpapatupad ng no-disconnection policy at installment payment scheme para sa mga hindi pa nababayarang electric bill bilang patuloy na ayuda sa mga konsyumer sa gitna ng mataas na presyo ng kuryente.
Sa advisory na inilabas ng ERC noong Hulyo 16, inatasan ang lahat ng distribution utilities sa bansa na huwag munang putulan ng serbisyo ang mga residential at non-residential consumers na may hindi pa nababayarang electric bills para sa billing period ng Agosto hanggang Oktubre 2026.
Inatasan din ng komisyon ang mga distribution utilities na ipagpatuloy ang installment o deferred payment scheme para sa mga konsyumer na may buwanang konsumo na hindi hihigit sa 200 kilowatt-hours (kWh). Sa ilalim nito, maaaring bayaran ang kanilang electric bill sa loob ng hindi bababa sa tatlong buwan, at ilalagay ang hulugang bayarin sa mga susunod na billing statement.
Ayon sa ERC, ang pagpapalawig ng consumer protection measures ay alinsunod sa umiiral na State of National Energy Emergency na idineklara ng pamahalaan noong Marso dahil sa epekto ng tensyon sa West Asia sa pandaigdigang presyo ng enerhiya.
Sinabi naman ni ERC Chairperson Francis Saturnino Juan na isinasaalang-alang din ng komisyon ang mga reklamo ng mga konsyumer kaugnay ng biglaang pagtaas ng kanilang electric bills.
Nauna nang ipinatupad ang no-disconnection policy para sa billing period ng Mayo hanggang Hulyo 2026, bago ito pinalawig ng panibagong tatlong buwan.
