DOE target mabawasan ang diesel dependency ng Romblon pagsapit ng 2030

Target ng Department of Energy (DOE) na mabawasan ang pagdepende ng Romblon sa diesel bilang pangunahing pinagkukunan ng kuryente pagsapit ng 2030 sa pamamagitan ng pagpapalawak ng renewable energy (RE) projects at paghikayat sa pagpasok ng mas maraming power producers sa lalawigan.

Sa ginanap na Multi-Stakeholder Dialogue on the Energy Crisis na inorganisa ng pamahalaang panlalawigan.

Sa kasalukuyan, may 9.27 megawatts (MW) nang renewable energy capacity ang Romblon na nasa commercial operation, na binubuo ng 7.92-MW Tumingad Island Solar Power Project sa Odiongan at 1.35-MW Cantingas Hydroelectric Power Plant sa San Fernando, Sibuyan. Mayroon ding 2.54 MW ng karagdagang renewable energy projects na nakatakdang maisakatuparan, kabilang ang 0.12-MW Tumingad 2 Solar Power Plant, 1.52-MW Silum-1 Hydroelectric Power Project, at 0.9-MW Romblon Wind Power Project.

Kabilang sa mga pangunahing layunin ng plano ang pagdaragdag ng renewable energy capacity, deployment ng Renewable Energy (RE) at Battery Energy Storage System (BESS) sa mga piling island grids, pagbabawas ng paggamit ng diesel, pagpapahusay ng reliability at power quality, at pagpapatatag ng power systems sa mga isla ng Tablas, Sibuyan, at Romblon.

Ayon kay Joed Barallas, Senior Science Research Specialist ng DOE, inaasahan ding mababawasan ang epekto ng pabago-bagong presyo ng diesel fuel sa halaga ng kuryente sa lalawigan kapag naisakatuparan ang mga nakaplanong proyekto.

Kasabay nito, sinabi ng Barallas na bukas ang DOE sa pagpasok ng mga bagong New Power Producers (NPPs) at renewable energy developers sa Romblon sa pamamagitan ng mga susunod na Competitive Selection Process (CSP) ng mga electric cooperative.

Aniya, makatutulong ito sa pagpapalawak ng power generation options, pagpapataas ng kompetisyon, at pagpapabilis ng paglipat sa mas malinis na pinagkukunan ng enerhiya.

“Hindi lang siya monopolized by isang NPP. Maganda nga po iba-iba, so dapat may ibang technology. Hindi lang po puro diesel, so maganda po ma-harness din ang renewable energy,” paliwanag ni Barallas.

Binigyang-diin din ng ahensya ang kahalagahan ng maagang paghahanda ng mga electric cooperative sa pagpili ng mga susunod na power supplier. Inirekomenda rin ng DOE na simulan ng mga electric cooperative ang Competitive Selection Process (CSP) humigit-kumulang limang taon bago matapos ang umiiral na power supply contract upang mabigyan ng sapat na panahon ang mga posibleng bidder at investors na makilahok sa susunod na procurement at makapag-alok ng karagdagang suplay ng kuryente.

Ayon pa kay Barallas, ang mga hakbang na ito ay bahagi ng pangmatagalang estratehiya ng pamahalaan upang matiyak ang mas malinis, mas matatag, at mas napapanatiling suplay ng kuryente sa Romblon, habang unti-unting binabawasan ang pagdepende ng lalawigan sa diesel-fired power generation.