Mas marami nang oportunidad na maibenta ang mga produktong gawa ng mga micro, small, and medium enterprises (MSMEs) sa Romblon matapos buksan ng Department of Trade and Industry (DTI)-Romblon at ng Pamahalaang Bayan ng San Agustin ang bagong One Town, One Product (OTOP) Hub sa D'Sail Port Terminal sa Poblacion, San Agustin noong July 13.
Inaasahang magpapalawak ng market access ng mga lokal na negosyo ang OTOP Hub sa pamamagitan ng paglalapit ng mga produktong gawa sa Romblon sa mga biyahero, turista, at iba pang mamimiling dumaraan sa isa sa mga pangunahing pantalan ng lalawigan.
Pinangunahan nina San Agustin Mayor Aaron James Madrona at DTI Romblon Provincial Director Orville Mallorca ang pagbubukas ng pasilidad, kasama ang mga lokal na opisyal at kinatawan ng sektor ng negosyo.
Tampok sa OTOP Hub ang iba't ibang produktong gawa ng mga MSME mula sa San Agustin at iba pang bayan sa Romblon, kabilang ang mga processed food, lokal na delicacies, handicrafts, souvenirs, wearables, home décor, at iba pang produktong nagpapakita ng kultura at husay ng mga Romblomanon.
Ayon kay Mayor Madrona, patuloy na isinusulong ng lokal na pamahalaan ang mga programang nagbibigay ng mas maraming oportunidad sa mga lokal na negosyante upang mapalago ang kanilang kabuhayan.
Samantala, sinabi ni Mallorca na higit pa sa isang tindahan ang OTOP Hub dahil nagsisilbi rin itong plataporma upang maipakilala ang kalidad at identidad ng mga produktong gawa sa Romblon habang hinihikayat ang publiko na tangkilikin ang mga lokal na produkto.
Idinagdag niya na ang lokasyon ng pasilidad sa loob ng passenger terminal ay magbibigay ng mas malaking exposure sa mga MSME at makatutulong upang mapalawak ang kanilang merkado at mapataas ang kanilang kita.
Ang pagtatatag ng OTOP Hub ay bahagi ng OTOP Philippines Program ng DTI na naglalayong suportahan ang mga MSME sa pamamagitan ng product development, branding, marketing assistance, at pagpapalawak ng market opportunities.
Inaasahan ng DTI na sa pamamagitan ng bagong OTOP Hub, mas maraming produktong gawa sa Romblon ang makararating sa mas malawak na pamilihan, na magbubukas ng karagdagang kabuhayan at magpapalakas sa lokal na ekonomiya ng lalawigan.
