Umabot sa 6,000 kilo ng bigas ang naibenta ng Department of Agriculture–Agribusiness and Marketing Assistance Division (DA-AMAD) sa mga benepisyaryo sa mga bayan ng San Agustin at Odiongan sa ilalim ng programang “Benteng Bigas Meron Na!”
Isinagawa ang rollout ng programa sa San Agustin noong Hulyo 28, kung saan 3,000 kilo ng bigas ang ipinagbili sa halagang ₱20 kada kilo para sa mga kuwalipikadong benepisyaryo mula sa mahihirap at vulnerable sectors, kabilang ang mga senior citizen, solo parents, persons with disabilities (PWDs), minimum wage earners, at mga indigent families.
Sinundan ito ng bentahan sa Odiongan noong Hulyo 29, kung saan naubos din ang 3,000 kilo ng bigas na inilaan para sa mga benepisyaryo ng programa.
Ang rollout sa dalawang bayan ay bahagi ng patuloy na pagpapalawak ng administrasyon ni Pangulong Bongbong Marcos sa programang naglalayong mapagaan ang gastusin sa pagkain ng mga pamilyang Pilipino sa pamamagitan ng pagbebenta ng dekalidad na bigas sa halagang ₱20 kada kilo.
