Dalawampu't tatlong Persons Deprived of Liberty (PDL) mula sa Odiongan District Jail at Romblon District Jail ang nakinabang sa magkahiwalay na outreach programs na isinagawa ng Provincial Social Welfare and Development Office (PSWDO) ng Romblon bilang bahagi ng patuloy nitong pagsusulong ng kapakanan at rehabilitasyon ng mga PDL.
Noong July 27, isinagawa sa Odiongan District Jail ang programang “Lingap at Pag-asa: Pag-aaruga at Pagmamalasakit,” kung saan 12 senior citizen PDL ang tumanggap ng mga gamot, hygiene kits, at grocery packs.
Pinangunahan ng PSWDO ang aktibidad sa pamamagitan ng Tanggapan ng Gobernador, katuwang ang Office of the Senior Citizens Affairs (OSCA) at Federation of Senior Citizens Association of the Philippines–Romblon (FSCAP-R).
Samantala, noong July 29, nagsagawa rin ang PSWDO ng outreach program sa Romblon District Jail na dinaluhan ng 11 PDL.
Kabilang sa mga isinagawang aktibidad ang Zumba, singing activity, “Kumustahan,” at open forum, bukod sa pamamahagi ng hygiene kits, grocery packs, at food packs upang makatulong sa kanilang kalusugan at pang-araw-araw na pangangailangan.
Ayon sa PSWDO, layunin ng mga programa na maihatid ang mga serbisyong panlipunan sa mga Persons Deprived of Liberty at mapalakas ang kanilang pisikal, emosyonal, at panlipunang kapakanan bilang bahagi ng kanilang rehabilitasyon.
Ipinakita rin ng magkahiwalay na aktibidad ang patuloy na pagtutulungan ng PSWDO, mga katuwang na ahensya, at Bureau of Jail Management and Penology (BJMP) MIMAROPA sa paghahatid ng mga serbisyong nagbibigay ng pag-asa, malasakit, at pagkakataon para sa positibong pagbabago ng mga Persons Deprived of Liberty.
