Pormal nang itinakda ng Lokal na Pamahalaan ng San Agustin ang ikatlong Sabado ng Hunyo bilang taunang San Agustin Municipal LGBTQIA+ Pride Day matapos maipasa ng Sangguniang Bayan ang kaukulang ordinansa.
Ayon sa San Agustin Public Information Office, layunin ng ordinansa na gawing institusyonal ang taunang pagdiriwang ng LGBTQIA+ Pride Day sa munisipalidad at isulong ang inclusivity, pagkakapantay-pantay, at paggalang sa loob ng komunidad.
Sinabi ni Public Information Officer Alyssa Magracia na ipinapakita ng hakbang ang suporta ng lokal na pamahalaan sa paglikha ng isang komunidad na malaya sa diskriminasyon habang kinikilala ang ambag ng mga miyembro ng LGBTQIA+ community sa pag-unlad ng bayan.
Sa isang pahayag, sinabi ng lokal na pamahalaan na kinikilala ng ordinansa ang karapatan ng bawat indibidwal na mamuhay nang may dignidad, paggalang, at kalayaang maipahayag ang kanilang pagkakakilanlan anuman ang kanilang gender identity o sexual orientation.
Bilang bahagi ng pagdiriwang ngayong taon, isasagawa sa Hunyo 20 ang “Araw ng Bangkang Bahaghari” na magtatampok ng iba't ibang aktibidad kabilang ang Human Immunodeficiency Virus (HIV) testing at counseling, information and awareness sessions, face painting booth, pride parade, at ang Gala King and Queen 2026 competition.
Ayon sa mga opisyal ng munisipyo, layunin ng taunang pagdiriwang na palawakin ang kamalayan ng publiko, hikayatin ang pakikilahok ng komunidad, at magbigay ng pagkakataon para sa adbokasiya at pakikipag-ugnayan ng mga miyembro ng LGBTQIA+ community at kanilang mga kaalyado.
Dahil sa ordinansa, kabilang na ang San Agustin sa mga lokal na pamahalaan sa Romblon na may institusyonalisadong pagdiriwang kaugnay ng Pride Month.
Samantala, magsasagawa rin ang Pamahalaang Panlalawigan ng Romblon ng mga aktibidad para sa Pride Month sa mga bayan ng Odiongan at Romblon simula Hunyo 27. Kabilang sa mga nakatakdang aktibidad ang civic parade at iba pang programang naglalayong palawakin ang kamalayan at suporta para sa LGBTQIA+ community.
