Nagtapos noong Hunyo 4 ang unang implementasyon ng Project Silong Literacy Caravan ng Lokal na Pamahalaan ng Odiongan matapos ang apat na linggong pagsasagawa ng mga aktibidad sa literacy, kalusugan, at personal safety para sa mga bata sa Sitio Canlumay, Barangay Tumingad.
Pinangunahan ang programa ng Odiongan Public Library sa pakikipagtulungan ng Rural Health Unit (RHU), Gender and Development (GAD) Office, at Municipal Social Welfare and Development Office (MSWDO).
Nakinabang sa programa ang mga batang may edad dalawa hanggang walong taong gulang sa pamamagitan ng mga reading session, storytelling activities, at learning modules na nakatuon sa literacy, health awareness, at personal safety.
Ayon kay Vice Mayor Michael Arevalo, inilunsad ang literacy caravan upang mailapit ang mga serbisyong pang-edukasyon at pangkalusugan sa mga batang naninirahan sa malalayong komunidad.
Sa loob ng apat na linggo, nagsagawa ang mga volunteer storyteller ng mga sesyon sa pagbasa at iba pang interactive learning activities upang ipakilala sa mga bata ang mga aklat, babasahin, at mga batayang konseptong pang-edukasyon gamit ang mga paraang angkop sa kanilang edad.
Kinilala rin ni Arevalo ang suporta ng GAD Office, RHU, Public Library, MSWDO, Local Youth Development Office (LYDO), mga miyembro ng Sangguniang Bayan, mga opisyal ng Barangay Tumingad, mga magulang, at iba pang katuwang na sektor na naging bahagi ng programa.
Sinabi rin niya na pinag-aaralan ng lokal na pamahalaan ang pagpapalawak ng Project Silong sa iba pang barangay sa Odiongan kasunod ng pagtatapos ng pilot implementation sa Sitio Canlumay.
Ayon pa kay Arevalo, nakahanda ang lokal na pamahalaan na ulitin ang programa sa iba pang komunidad upang mas marami pang bata ang mabigyan ng pagkakataong makinabang sa mga gawaing pangliterasiya at pagkatuto.
Ang Project Silong ay ipinatupad sa pamamagitan ng pagtutulungan ng iba't ibang tanggapan ng lokal na pamahalaan, mga boluntaryo, at mga katuwang sa komunidad bilang bahagi ng pagsusulong ng literacy at community-based learning initiatives sa mga liblib na lugar ng munisipalidad.
Discussion about this post