Nagpasalamat ang Lokal na Pamahalaan ng Cajidiocan kay Pangulong Ferdinand Marcos Jr. matapos makatanggap ng P10 milyong Local Government Support Fund (LGSF) na gagamitin para sa rice subsidy program at rehabilitasyon ng pampublikong pamilihan ng bayan.
Sa panayam sa Kapihan sa PIA Romblon, sinabi ni Mayor Marvin Ramos na malaking tulong ang pondong ipinagkaloob ng pambansang pamahalaan sa pagpapatupad ng mga programang nakatuon sa pagkain at imprastraktura.
Ayon sa alkalde, makatutulong ang rice subsidy program sa mga pamilyang kabilang sa sektor ng mga senior citizen, solo parent, at persons with disabilities na napiling benepisyaryo ng programa.
Dagdag niya, inaasahang makikinabang dito ang nasa 2,500 hanggang 3,000 pamilya sa bayan sa pamamagitan ng serye ng pamamahagi ng bigas na isasagawa kada dalawang buwan.
Sinabi rin ni Ramos na mahalagang suporta ang pondong inilaan para sa rehabilitasyon ng public market dahil matagal nang kabilang sa mga prayoridad ng lokal na pamahalaan ang pagsasaayos ng naturang pasilidad.
Aniya, gagamitin ang P5 milyong pondo bilang panimulang pondo para sa proyekto habang maglalaan pa ang lokal na pamahalaan ng karagdagang pondo upang maisakatuparan ang kabuuang plano sa modernisasyon ng pamilihan.
Ayon pa sa alkalde, layunin ng proyekto na mapaunlad ang pasilidad upang matugunan ang kasalukuyang pangangailangan ng mga mamimili at negosyante sa bayan.
Sinabi ni Ramos na ito ang isa sa pinakamabilis na pagproseso at paglalabas ng support fund na naranasan ng kanilang lokal na pamahalaan para sa mga prayoridad na programa at proyekto.
Umaasa rin ang lokal na pamahalaan na magpapatuloy ang mga kahalintulad na programa upang mas marami pang sektor at proyekto ang mapondohan sa mga susunod na taon.
