Mas mapapadali na ang paghahatid ng mga serbisyo ng pamahalaan sa mga residente ng Barangay Canduyong sa Odiongan at Barangay Victoria sa San Andres matapos makumpleto ng Department of Public Works and Highways (DPWH) ang pagtatayo ng mga bagong barangay hall sa dalawang komunidad.
Ayon kay DPWH Romblon Assistant District Engineer Winona Faderogaya, mahalagang imprastraktura ang mga barangay hall dahil nagsisilbi itong sentro ng mga transaksyon, pagpupulong, at iba pang serbisyong kailangan ng mga residente.
“Kapag may mga pangangailangan sila with regards sa kanilang social activities at mga pangangailangan sa bawat barangay, nandiyan ang mga pasilidad na makakatulong sa kanila,” ani Faderogaya.
Sa Barangay Victoria, itinayo ang isang dalawang-palapag na barangay hall na may mga opisina, conference room, session hall, comfort rooms, at mga accessibility features tulad ng rampa para sa senior citizens at persons with disabilities (PWDs).
Ayon kay Barangay Captain Patricio Galibo Jr., napalitan na ng bagong gusali ang dati at masikip na barangay hall na nahihirapang mag-accommodate ng mga residente at mga transaksyon sa barangay.
“Ang napakagandang nangyari ay nagkaroon kami ng isang barangay hall na makaka-accommodate sa aming mga residente at mapapadali ang mga transaksyon sa barangay,” ani Galibo.
Samantala, natapos na rin ang bagong barangay hall sa Barangay Canduyong na magsisilbing one-stop facility para sa iba't ibang serbisyo ng barangay, kabilang ang mga programa para sa senior citizens, persons with disabilities, at mga kaso ng violence against women and children (VAWC).
Sinabi ni Barangay Captain Jerry Tombocon na malaking tulong ang bagong gusali dahil luma na at hindi na sapat ang dating barangay hall upang matugunan ang pangangailangan ng komunidad.
“Napakaganda ng impact kasi moderno na at one-stop na ang serbisyo. Kumpleto ang mga pasilidad at mas napapaganda ang serbisyo para sa aming mga kabarangay,” aniya.
Ayon pa kay Faderogaya, maaari ring magsilbing operations at coordination center ang mga barangay hall sa panahon ng kalamidad at iba pang emergency, habang ang mga covered court na itinayo ng DPWH sa iba't ibang barangay ay maaaring gamitin ng mga lokal na pamahalaan bilang evacuation center kung kinakailangan.
Sinabi rin niya na patuloy na nagpapatupad ang DPWH ng mga proyektong pang-imprastraktura tulad ng barangay halls, access roads, covered courts, at iba pang community facilities upang mapalakas ang lokal na pamamahala, mapabuti ang access sa mga serbisyo ng pamahalaan, at mapataas ang kahandaan ng mga komunidad sa panahon ng sakuna.
Ang mga bagong barangay hall sa Canduyong at Victoria ay kabilang sa mga proyektong ipinatutupad ng DPWH sa Romblon sa ilalim ng kampanyang “Build Right, Serve Right.”
