Nagsagawa ng pagsasanay sa food processing ang Technical Education and Skills Development Authority (TESDA) at Overseas Workers Welfare Administration para sa mga pamilya ng Overseas Filipino Workers (OFWs) sa lalawigan ng Romblon, bilang bahagi ng kanilang programang pangkabuhayan.
Isinagawa ang training sa pangunguna ng Romblon Provincial Training Center kung saan 24 na benepisyaryo mula sa iba’t ibang bayan ang tinuruan ng paggawa ng chicken tocino at calamansi juice na maaari nilang gawing panimulang negosyo sa kanilang komunidad.
Ayon kay Angelyn Elisan, Family Welfare Officer ng OWWA Romblon, layunin ng programa na mabigyan ng karagdagang kasanayan ang mga pamilya ng OFWs upang magkaroon sila ng alternatibong mapagkukunan ng kita habang ang kanilang mga kaanak ay nagtatrabaho sa ibang bansa.
Dagdag pa niya, ang ganitong uri ng pagsasanay ay bahagi ng patuloy na suporta ng pamahalaan sa mga OFW families, lalo na sa aspeto ng kabuhayan at reintegration.
Samantala, kinilala naman ni Atty. Glenn Niño M. Sartillo, Provincial Director ng TESDA Romblon, ang kahalagahan ng mga skills training na ito, lalo na’t isinagawa kasabay ng pagdiriwang ng Labor Day.
Ayon kay Sartillo, ang pagbibigay ng praktikal na kasanayan sa food processing ay makatutulong upang mapalakas ang kakayahan ng mga benepisyaryo na magsimula ng sariling negosyo o dagdag na pagkakakitaan.
Ipinaliwanag din nito na ang mga natutunang kaalaman sa pagsasanay ay maaaring agad na magamit ng mga kalahok sa kanilang mga komunidad, lalo na kung may sapat na access sa mga pangunahing sangkap at pamilihan.
Hinikayat din nito ang mga benepisyaryo na ipagpatuloy ang pagsasanay sa mga training schools ng TESDA para mabigyan sila ng national certificate.
Ang aktibidad ay bahagi ng mas malawak na programa ng TESDA at OWWA sa ilalim ng Department of Migrant Workers na naglalayong suportahan ang mga OFWs at kanilang pamilya sa pamamagitan ng skills development at livelihood opportunities.
