Nagpakita ng matinding dominasyon ang Far Eastern University sa katatapos lamang na UAAP Football Tournament Season 88 matapos masungkit ang kampeonato sa High School Boys at Seniors Women’s Football nitong Abril 10, 2026.
Sa High School Boys division, nakuha ng FEU ang kampeonato matapos talunin ang University of Santo Tomas sa iskor na 2–1 sa finals. Ito na ang ika-13 kampeonato ng FEU sa loob ng 14 na season, patunay sa kanilang pagiging isa sa pinaka-dominanteng koponan sa UAAP Juniors football. Matatandaang hawak din ng FEU ang 12 sunod-sunod na kampeonato bago sila natalo ng UST noong nakaraang season, na agad naman nilang nabawi ngayong taon.
Kabilang sa koponan ng FEU Juniors ang Romblomanon na si Justin Madeja, isang 18-anyos na Grade 12 student. Nagsimula ang kanyang football career sa Romblon National High School kung saan dalawang beses siyang nakapaglaro sa Palarong Pambansa—noong elementarya at muli noong nakaraang taon sa Ilocos Norte. Matapos nito, sumubok siya sa tryouts ng FEU at naging bahagi ng koponan. Sa kanyang unang season, nakapagtala si Madeja ng dalawang goals at inaasahang muling maglalaro para sa FEU sa susunod na season.
Samantala, nasungkit din ng FEU ang kampeonato sa Women’s Football matapos talunin ang De La Salle University sa finals. Kabilang sa koponan ang isa pang Romblomanon na si Jash Nuevo.
Si Nuevo, 18 taong gulang, ay kasalukuyang first-year college student sa FEU na kumukuha ng kursong Bachelor of Science in Exercise and Sports Science major in Fitness and Sports Management. Bagama’t 10 buwan pa lamang siya sa koponan, agad siyang naging bahagi ng championship run ng FEU. Bago ito, nakapaglaro siya sa MIMAROPA RAA level bago sumabak sa UAAP.
Ipinapakita ng tagumpay nina Madeja at Nuevo ang patuloy na pag-angat ng mga atletang Romblomanon sa mas mataas na antas ng kompetisyon. Sa kasalukuyan, dumarami na rin ang mga manlalaro mula sa Romblon na lumalahok sa UAAP, NCAA at iba pang collegiate leagues sa bansa.
