Nagsimula nang gamitin ng mga pasahero ang bagong passenger terminal building sa Malbog Port sa bayan ng Looc, Romblon matapos itong pormal na ma-inaugurate noong March 4.
Ang pagtatayo ng gusali ay bahagi ng mga kinakailangang pasilidad upang makapagsimula ang operasyon ng roll-on/roll-off (RORO) vessel sa pantalan.
May modernong disenyo ang bagong terminal at nagtatampok ng maluwag na departure area para sa mga pasaherong maghihintay ng kanilang biyahe. Nilagyan din ito ng air-conditioning system upang maging mas komportable ang mga biyahero habang nasa loob ng gusali.
Pinangunahan ang inagurasyon nina Congressman Eleandro Jesus “Budoy” Madrona, Romblon Governor Trina Alejandra Firmalo-Fabic, Looc Mayor Lisette Arboleda, at Philippine Ports Authority Port Manager Christine Acorda.
Sa maikling programa, ibinahagi ni Mayor Arboleda ang naging kasaysayan ng pagbuo at pagpapaunlad ng Malbog Port hanggang sa kasalukuyang estado nito. Nagpasalamat din siya kay Congressman Madrona sa pagtulong upang makakuha ng pondo para sa pagpapagawa ng pantalan at ng bagong terminal building.
Nagpahayag din ng pasasalamat ang alkalde sa pagsuporta ni Madrona upang mabigyan ng permiso ng Maritime Industry Authority (MARINA) ang rutang daraan sa naturang pantalan.
Sa kanyang mensahe, binalikan naman ni Congressman Madrona ang papel ng Malbog Port sa transportasyon at kalakalan sa lalawigan ng Romblon. Ikinuwento niya na bata pa lamang siya ay nasaksihan na niya kung paano nagsilbing mahalagang daungan ang pantalan, lalo na sa paglalabas ng copra na pangunahing kabuhayan ng maraming pamilya noon.
Dahil dito, sinabi ng kongresista na malapit sa kanyang puso ang pagpapalakas ng sektor ng transportasyon.
Ipinahayag din niya ang kanyang suporta sa mga hakbang ng pamahalaang panlalawigan sa pangunguna ni Governor Firmalo-Fabic upang mapalakas ang inter-island connectivity sa lalawigan.
