Nakipagpulong ang Romblon State University (RSU) sa mga kinatawan ng mga institusyon sa Japan upang talakayin ang posibleng landas sa trabaho ng mga graduates ng unibersidad sa naturang bansa, kabilang ang pagbuo ng Japanese language programs, faculty training, at pagbalangkas ng Memorandum of Understanding.
Isinagawa ang exploratory meeting sa pangunguna ni University President Merian P. Catajay-Mani at ng mga Japanese partners na sina Yohko Seto ng ARCH Plus Company at SACHI International School, Fumio Yamada ng Yamahei Training School, at iba pang opisyal ng kanilang mga organisasyon.
Tinalakay sa pulong ang mga oportunidad sa trabaho para sa RSU alumni, lalo na ang mga hindi pa marunong mag-Japanese, partikular sa hospitality sector gaya ng front desk positions. Ibinahagi ng mga partner na may mga trabahong may flexible na oras, at pinahihintulutan ang international students sa Japan na magtrabaho ng hanggang 28 oras kada linggo sa panahon ng klase at 40 oras kapag bakasyon.
Iminungkahi rin ang pagbuo ng Japanese language program sa RSU, lalo na para sa mga kursong BS Accountancy, BS Hotel and Hospitality Management, at AB English. Kabilang sa mga plano ang pagre-recruit ng mga gurong may kakayahan sa iba’t ibang foreign languages at pagpapadala ng tatlo hanggang limang faculty members sa Japan para sa dalawa hanggang tatlong buwang language training.
Tinalakay din ang posibilidad ng faculty exchange kung saan maaaring magturo ng English ang RSU instructors sa Japan habang magtuturo naman ng Nihongo sa RSU ang isang sensei mula sa SACHI International School.
Napag-usapan din ang posibleng tatlong buwang refresher course sa Japanese language para sa mga faculty na may naunang training, kasabay ng pagrepaso sa kurikulum at paghahanap ng pondo para sa programa.
Ayon sa RSU, bahagi ito ng patuloy na internationalization efforts ng unibersidad, kung saan layon ng mga partner na palawakin ang oportunidad sa trabaho at pagsasanay ng mga Pilipinong graduates sa Japan.
