Isang lalaking magsasaka ang sugatan at isinugod sa ospital matapos umanong saksakin ng kanyang nakasuntukan dakong alas-2:45 ng hapon ng Enero 31 sa Sitio Duyom, Barangay Dubduban, San Agustin, Romblon.
Kinilala ang biktima na si alyas “Vin,” 53 taong gulang, may-asawa, magsasaka at residente ng nasabing lugar. Samantala, ang itinuturong suspek ay si alyas “Bert,” 31 taong gulang, walang trabaho at kabarangay ng biktima.
Batay sa imbestigasyon ng San Agustin Municipal Police Station (MPS), nagtungo umano ang biktima sa suspek upang pag-usapan at ayusin ang dati nilang alitan. Gayunman, sa halip na makipag-areglo ay hinamon umano ng suspek ang biktima ng suntukan.
Habang nagkakaroon ng pisikal na komprontasyon, bumunot umano ng patalim ang suspek at sinaksak ang biktima sa kanang bahagi ng tiyan. Sinubukan pang lumayo ng biktima ngunit hinabol pa rin ito ng suspek at hinampas umano ng bato sa ulo nang maabutan.
Isinugod ang biktima sa Tablas Island District Hospital ng mga nagmalasakit na residente upang mabigyan ng agarang lunas.
Naaresto naman ng mga rumespondeng tauhan ng San Agustin MPS ang suspek at narekober mula sa kanya ang ginamit na patalim. Inihahanda na ng pulisya ang pagsasampa ng kasong frustrated homicide laban sa suspek sa pamamagitan ng inquest proceedings sa Tanggapan ng Piskalya.
