Pinuri ni Brooke’s Point, Palawan Vice Mayor Mary Jean Feliciano ang matibay na pagkakaisa ng mga residente ng Sibuyan Island sa Romblon sa kanilang pagtutol sa pagmimina, matapos siyang dumalo sa anibersaryo ng barikada sa bayan ng San Fernando noong February 1.
Sa pagdiriwang na ginanap sa paanyaya ni Mayor Nanding Marin, binigyang-diin ng bise alkalde ang kahalagahan ng sama-samang pagkilos ng komunidad, na aniya’y nagbunga ng pagpapatigil sa operasyon ng isang malaking mining company sa isla.
Ayon kay Feliciano, ang pagbisita niya sa Sibuyan ay bahagi ng pagsisikap na pag-ugnayin ang mga komunidad mula Palawan hanggang Romblon na may iisang adhikain na mapangalagaan ang kanilang kalikasan at kabuhayan.
Iginiit din niya na hindi dapat mawalan ng pag-asa ang mga komunidad na tutol sa pagmimina, kahit pa may mga permit nang inilabas ang pambansang pamahalaan. Aniya, madalas gamitin ng ilang pro-mining na opisyal ang argumento na wala nang magagawa ang mga lokal na residente kapag may pahintulot na ang proyekto, ngunit pinatutunayan umano ng karanasan sa Sibuyan na may kapangyarihan ang nagkakaisang mamamayan.
Ibinahagi rin ng bise alkalde ang kanyang paghanga sa lawak ng partisipasyon ng iba’t ibang sektor sa isla, kabilang ang mga residente mula sa iba’t ibang antas ng pamumuhay, mga dating at kasalukuyang opisyal ng pamahalaan, senior citizens, at kabataan.
Binigyang-diin ni Feliciano na ang ganitong uri ng pagkakaisa ang nagsisilbing sandigan ng mga komunidad na nais protektahan ang kanilang likas-yaman laban sa mga proyektong nakikita nilang banta sa kapaligiran.
Ang barikada sa San Fernando, Sibuyan ay kinikilala ng mga residente bilang simbolo ng sama-samang pagkilos ng mamamayan upang ipagtanggol ang isla, na madalas tawaging “Galapagos of Asia” dahil sa natatanging biodiversity nito. Anila, ang naging karanasan sa Sibuyan ay patunay na ang pagkakaisa ng komunidad ay maaaring magbunga ng konkretong resulta sa laban para sa kalikasan.
