Patuloy na binabantayan ng Provincial Veterinary Office ang apat na bayan sa lalawigan ng Romblon dahil sa mga aktibong kaso ng African Swine Fever (ASF) sa ilang barangay.
Kabilang sa mga binabantayang lugar ang mga bayan ng Romblon, Calatrava, San Agustin, at Santa Maria.
Sa panayam ng Philippine Information Agency Romblon kay Cesar Royo ng Romblon Provincial Veterinary Office, sinabi nitong ang pinakahuling kaso ay ang pagpositibo sa ASF ng isang baboy na namatay kamakailan sa Barangay Bunga, Santa Maria, Romblon.
Ayon sa datos ng Provincial Veterinary Office, mula nang muling sumiklab ang ASF sa lalawigan noong Nobyembre ng nakaraang taon, tinatayang 883 baboy na ang namatay sa bayan ng San Agustin, 453 baboy sa bayan ng Romblon, at 15 baboy sa Calatrava.
Bukod sa mga namatay na baboy, nagsagawa rin ng depopulation ang Provincial Veterinary Office katuwang ang mga lokal na pamahalaan sa ilang lugar. Umabot sa 382 baboy ang pinatay sa bayan ng Calatrava, habang 273 baboy naman ang kinailangang i-depopulate sa bayan ng Romblon.
Nilinaw ni Royo na ang San Agustin ang tanging bayan sa mga apektadong lugar na hindi nagsagawa ng depopulation.
Dahil sa patuloy na banta ng ASF, pinayuhan ni Joselito Fabon ng Provincial Veterinary Office ang mga lokal na pamahalaang katabi ng mga bayang may aktibong kaso na higpitan ang pagbabantay sa kanilang mga checkpoint upang maiwasan ang pagpasok at pagkalat ng sakit sa iba pang lugar.
