Magkakaloob ng tig-₱500 na cash assistance ang lokal na pamahalaan ng Cajidiocan sa lahat ng Day Care at Kinder pupils sa bayan bilang pamaskong handog para sa mga bata, ayon sa anunsyo ni Mayor Marvin Greggy Ramos.
Saklaw ng tulong ang kabuuang 1,010 mag-aaral, kung saan 470 ay mula sa mga Day Care center at 540 naman ang mga Kinder pupils sa iba’t ibang barangay ng Cajidiocan.
Ayon kay Ramos, ang cash assistance ay ipagkakaloob sa mga magulang o guardian ng mga bata upang magamit sa mga pangunahing pangangailangan ng kanilang mga anak.
Layunin ng programa na makatulong sa mga pamilya ngayong Kapaskuhan, lalo na sa pagbili ng mga gamit na mahalaga sa pag-aaral at pang-araw-araw na pangangailangan ng mga bata.
Nilinaw rin ng LGU na malaya ang mga magulang na gamitin ang tulong-pinansyal batay sa pangangailangan ng kanilang mga anak.
Nauna nang namahagi ang lokal na pamahalaan ng mga pamaskong laruan para sa mga Day Care pupils noong Disyembre 13, kasabay ng katatapos na Municipal Children’s Month celebration, bilang bahagi ng patuloy na mga programang nakatuon sa kapakanan at kasiyahan ng mga bata sa bayan.
Ayon pa kay Ramos, ang pamaskong cash assistance ay bahagi ng mga inisyatiba ng LGU Cajidiocan upang ipadama ang malasakit sa mga kabataang Cajidiocanon at suportahan ang kanilang paglaki at pag-unlad, lalo na sa panahon ng Kapaskuhan.
