Kinumpirma ng mga lokal na pamahalaan ng Calatrava at San Agustin na tinamaan na ng African Swine Fever (ASF) ang ilang baboy sa kanilang mga nasasakupan, kasunod ng naunang kaso ng sakit sa bayan ng Romblon noong nakaraang buwan.
Sa pahayag ng LGU Calatrava, ilang baboy sa piling barangay ang nagpositibo sa ASF, patunay na nakapasok na ang virus sa bayan sa kabila ng ipinatutupad na border control measures.
Dahil dito, hinikayat ang mga hog raisers na maging mas mapagmatyag, sumunod sa mahigpit na biosecurity protocols, at iwasan ang pagbebenta, pagkatay, at paglilipat ng mga baboy nang walang pahintulot ng mga awtoridad.
Nanawagan din ang pamahalaang bayan ng Calatrava ng kooperasyon mula sa publiko upang mapigilan ang tuluyang pagkalat ng sakit at maprotektahan ang kabuhayan ng mga magbababoy.
Samantala, sa bayan ng San Agustin, kinumpirma rin ang pagpositibo at pagkamatay ng ilang baboy dahil sa ASF. Kaugnay nito, naglabas ng isang executive order si Mayor Aaron James Madrona na nagbabawal sa paglabas ng lahat ng uri ng produktong baboy mula sa bayan patungo sa ibang lugar sa lalawigan.
Mahigpit ding ipinatutupad ang pagbabawal sa pagkatay ng baboy sa labas ng itinalagang slaughterhouse.
Sa gitna ng patuloy na banta ng ASF, pinaalalahanan ng Philippine Crop Insurance Corporation ang mga hog raisers na iparehistro ang kanilang mga alagang baboy upang maipasok sa insurance program, bilang proteksiyon sakaling maapektuhan ng sakit ang kanilang mga alaga.
