Naaresto ng mga operatiba ng pulisya ang dalawang lalaking suspek sa panggagahasa at pagpatay sa isang babaeng miyembro ng IP community sa Barangay Otod, San Fernando, Romblon, sa magkahiwalay na operasyon na isinagawa noong Linggo, July 6.
Isa sa mga suspek, isang 21-anyos na lalaki, ay naaresto sa San Jose, Batangas City sa operasyon na pinangunahan ng Criminal Investigation and Detection Group (CIDG). Ang isa pang suspek naman ay nadakip sa bayan ng San Fernando sa Sibuyan Island.
Ayon kay Police Lt. Lemuel Rafol ng San Fernando Municipal Police Station, ang dalawang suspek ay nasasangkot sa insidente ng panggagahasa at pagpatay sa isang babae noong nakaraang taon.
Natagpuan ang biktima na wala nang buhay sa isang masukal na damuhan sa Barangay Otod.
Nahaharap ang mga suspek sa kasong rape with homicide, na walang inirerekomendang piyansa ayon sa warrant of arrest na inilabas ng Regional Trial Court Branch 106 sa Cajidiocan, Romblon.
