Isang lalaki ang nasawi habang isa pa ang sugatan matapos ang insidente ng pananaksak sa isang lamayan sa Barangay Guinbirayan, Santa Fe, Romblon noong gabi ng Hunyo 16.
Ayon sa imbestigasyon ng pulisya, ang mga biktima, kapwa residente ng nasabing barangay, ay dumadalo sa isang lamay nang magkaroon umano ng pagtatalo sa pagitan nila at ng isang 42-anyos na meat vendor mula sa Barangay Danao Sur.
Sa kasagsagan ng pagtatalo, sinuntok umano ng isa sa mga biktima ang suspek sa mukha. Dahil dito, gumanti umano ang suspek gamit ang isang kutsilyo at sinaksak ang dalawa sa kanilang tiyan.
Agad dinala ang mga biktima sa Don Modesto Formilleza Sr. Memorial Hospital sa bayan ng Looc, ngunit idineklara nang dead on arrival ang isa sa kanila. Ang isa pa ay kasalukuyang nagpapagaling sa ospital.
Tumakas ang suspek matapos ang insidente ngunit naaresto rin ng mga operatiba ng Santa Fe Municipal Police Station sa isinagawang follow-up operation. Nakuha sa kanya ang isang kitchen knife na pinaniniwalaang ginamit sa pananaksak.
Nahaharap ngayon ang suspek sa mga kasong homicide at frustrated homicide.
Patuloy ang imbestigasyon ng pulisya upang matukoy ang buong detalye ng insidente.
