Balik-kulungan ang isang lalaking tumakas sa Iwahig Prison and Penal Farm (IPPF) sa Palawan noong 1998 matapos siyang maaresto sa isinagawang operasyon sa San Fernando, Romblon.
Ang suspek, na ngayon ay 59 taong gulang, ay naaresto sa Sitio Canggomon, Barangay Mabini sa nasabing bayan.
Pinagsanib-puwersa ang mga tauhan ng San Fernando Municipal Police Station, Calatrava Municipal Police Station, Bureau of Corrections, at IPPF Fugitive Recovery Team upang maisakatuparan ang operasyon.
Batay sa ulat, ang suspek ay nakakulong noon sa IPPF dahil sa kasong Homicide na isinampa sa kanya sa Regional Trial Court Branch 81 sa Romblon, Romblon. Matapos ang kanyang pagtakas mahigit dalawang dekada na ang nakalilipas, matagumpay siyang natunton at inaresto ng mga awtoridad.
Inaasahang ibabalik ang suspek sa kustodiya ng Bureau of Corrections.
