Masaya at taos-pusong nagpasalamat si Senador Lito Lapid matapos siyang mapasama sa Top 3 ng pinakabagong survey ng Social Weather Stations (SWS) para sa 2025 Senatorial elections.
Ayon sa resulta ng SWS na isinagawa noong Abril 11 hanggang 15, 2025, pumangatlo si Lapid sa listahan ng mga kandidatong nais iboto ng publiko, matapos makakuha ng 34% voter preference mula sa 1,800 rehistradong botante na tinanong sa buong bansa.
“Natawa ako sa tuwa at pasasalamat,” ani Lapid sa panayam sa Agoo, La Union. “Unang-una sa ating mahal na Panginoon, at siyempre sa ating mga kababayan na patuloy na nagtitiwala at nagmamahal. Susuklian ko po ito ng mas lalo pang tapat at pusong paglilingkod.”
Nanguna sa survey si Senador Bong Go, habang nasa ikalawang puwesto si Senador Erwin Tulfo.
Hindi rin kinalimutan ni Lapid ang kanyang adbokasiya para sa mga mahihirap. Aniya, patuloy siyang magsusulong ng mga batas na tutugon sa mga pangunahing pangangailangan ng mga tao gaya ng pagkain, edukasyon, kalusugan, trabaho, turismo, at suporta sa senior citizens.
Matatandaang noong Disyembre 2024, nasa ika-11 pwesto lamang si Lapid. Subalit mula noon ay sunod-sunod na siyang umakyat sa rankings, kabilang ang Top 3-5 spot noong Enero, Pebrero, at Marso 2025.
Habang palapit ang halalan, tuluy-tuloy pa rin ang pag-ikot ng aktor-senador sa mga lalawigan upang personal na makausap ang taumbayan. Kung muling palarin, ito na ang kanyang ika-apat na termino sa Senado.
