Sa isinagawang pre-Labor Day solidarity walk ngayong araw, humigit-kumulang isang daang estudyante at youth volunteers na tinawag na “CHELdren” mula sa Akbayan Partylist ang nagmartsa sa kahabaan ng University Avenue sa UP Diliman bilang pakikiisa sa laban ng mga manggagawa.
Nagtapos ang aktibidad sa harap ng Palma Hall—isa sa mga makasaysayang lugar ng mga kilos-protesta ng kabataan—kung saan nagtalumpati si Atty. Chel Diokno, unang nominee ng Akbayan Partylist.
“Ikinararangal ko na makita ang kabataang Pilipino na aktibong ipinaglalaban ang karapatan ng mga manggagawa. Lahat tayo ay may bahagi sa pag-unlad ng ekonomiya ng bansa, kaya nararapat lamang na itaas ang minimum wage sa ₱200,” ani Diokno.
Nanawagan rin siya ng pagwawakas sa “Endo” o end-of-contract scheme na matagal nang nagpapahirap sa mga manggagawa.
“‘Wag na nating ipamana ang Endo sa mga bagong graduate. Sana sila na ang unang batch na makakaranas ng trabaho na may seguridad,” dagdag pa niya.
Ayon kay Akbayan Youth Secretary General Khylla Meneses, mahalagang itaas ang sahod at wakasan ang kontraktwalisasyon para sa kinabukasan ng kabataan.
“Hindi sapat ang minimum wage ngayon. Kapag tinaasan ang sahod at tinanggal ang kontraktwalisasyon, mas makakaipon ang mga working students at mas may dahilan ang mga bagong graduate para manatili sa Pilipinas,” sabi ni Meneses.
Nakiisa rin sa solidarity walk ang iba pang youth groups gaya ng Akbayan Youth, Student Council Alliance of the Philippines (SCAP), UP Alyansa, at Buklod CSSP, na sama-samang nanawagan ng makataong pasahod at disenteng trabaho para sa lahat ng manggagawang Pilipino.
