Nasawi ang isang binatilyo sa San Fernando, Romblon noong Disyembre 23 sa kasagsagan ng suntukan sanhi ng selos sa nobya.
Ayon sa imbestigasyon ng pulisya, naganap ang insidente bandang alas-2 ng hapon nang dumalaw ang biktima sa bahay ng isang kaibigan kasama ang kanyang nobya, na isa ring menor de edad. Naroon din ang suspek, isa ring binatilyo mula Barangay Mabini, na umiinom kasama ang apat na iba pa.
Nag-ugat ang alitan nang magselos ang suspek at nakipagtalo sa biktima. Nauwi ito sa hamunan ng suntukan sa kalsada. Sinubukang pigilan ng mga saksi ang dalawa ngunit nabigo silang awatin ang away.
Habang nagsusuntukan, tinamaan ng malakas na suntok sa panga ang biktima, dahilan upang ito’y matumba at mabagok ang ulo sa kalsada. Sinundan pa ito ng suntok ng suspek sa ulo ng biktima, dahilan upang mawalan ito ng malay.
Isinugod ang biktima sa Rural Health Unit matapos mabigyan ng paunang lunas sa bahay, ngunit idineklarang patay bandang alas-8 ng gabi ng doktor sa munisipyo.
Samantala, tumakas ang suspek matapos ang insidente ngunit nahuli rin kalaunan ng mga awtoridad. Nasampahan na ito ng kaukulang kaso kaugnay ng pagkamatay ng biktima.
