Patay ang isang laborer sa Barangay Tabugon sa Santa Fe, Romblon matapos itong barilin ng kanyang kainuman nitong hapon ng May 5.
Kinilala ng Romblon Police Provincial Office ang biktima na si Josue Fernando Magbanua Jr, 46.
Ayon sa police report, habang nakikipag-inuman umano ang biktima sa suspek na si Arvin Fernando, 35, at 2 pang kasama, bigla umanong nagtalo ang biktima at ang suspek sa hindi pa tukoy na dahilan. Habang nagtatalo ay walang ano-ano ay bigla umanong bumunot ng hindi pa tukoy na kalibre ng baril ang suspek at binaril ang biktima sa tiyan.
Sinubukan pang dalhin sa Don Modesto Formilleza Sr. Memorial Hospital ang biktima ngunit idineklara din itong dead on arrival ng doctor.
Ang suspek naman ay naaresto ng mga kapulisan sa isang hot pursuit operation sa Barangay Manhac sa Looc, Romblon matapos tumakas sa crime scene.
Nakakulong na ito ngayon at mahaharap sa kasong murder.
