Humingi ng pasensya sa mga pasahero ang isa sa mga anak ng may-ari ng nadisgrasyang MBCA King Sto. Niño 7 sa Simara kahapon at sinabing magpapaabot ng tulong sa abot ng kanilang makakaya sa pamilya ng nasawi sa aksidente.
Ayon kay Karl Moreno, anak ng may-ari ng bangka, walang may gusto sa nasabing aksidente.
“Hindi natin ginusto ‘yung mga nangyari doon. Humihingi ako ng pasensya talaga kung ano man ang nangyari lalo na doon sa namatay. Rest assured na gagawan natin ng paraan kung ano man ang puwede nating matulong nalang doon,” pahayag nito sa programang Mata ng Bayan Online.
Sa nasabing programa ay itinanggi rin ni Moreno ang sinasabi ng ilan na luma na ang kanilang bangka at may overloading na nangyari. Aniya, hindi papayagan ng Philippine Coast Guard na maglayag ang kanilang bangka kung hindi ito papasa sa siguridad ng MARINA at ng iba pang ahensya ng gobyerno na nagbigay ng lisensya sa kanilang bangka.
Naunang iniulat ni Mayor Elmer Fruelda at ng Romblon Police Provincial Office na umabot sa 111 ang sakay ng bangka ngunit sa ulat ng PCG ay 90 lamang ang sakay nitong pasahero at 5 naman ang crew.
Ang MBCA King Sto. Niño 7 ay lumubog habang nasa biyahe mula Calatrava, Romblon patungong Simara Island tanghali ng Sabado matapos umano itong mabutas habang naglalayag. Isa ang nasawi sa aksidente.
