Inanunsyo ng Inter-Agency Task Force Agaisnt Covid-19 ng bayan ng Calatrava, Romblon na hindi muna sila tatanggap ng mga uuwing locally stranded individuals o LSI sa susunod na buwan.
Magsisimula ang pagsuspende ng uwi mula December 7 at magtatanggal hanggang January 6 sa susunod na taon.
Ayon kay Dr. Renato Menrige Jr., Municipal Health Officer ng bayan, humingi ng holiday break ang mga Barangay Health Emergency Response Teams (BHERTs), mga Barangay Officials, at mga Health Workers sa pag-aasikaso at pagmonitor sa mga LSI sa holiday season.
Ito ay para naman umano makasama nila ang kanilang mga pamilya sa pasko at sa bagong taon.
Tanging mga APOR o Authorized Persons Outside Residence at mga Returning OFWs na lamang ang tatanggapin ng bayan pagdating sa mga nabanggit na araw.
Tatanggapin rin nila ang mga residente ng bayan na babalik sa bayan matapos tumungo ng ibang probinsya para magpagamot.
