Ipinag-utos di umano ng Department of Environment and Natural Resources – Romblon ang pagpapagiba sa ilang establishments sa Carabao Island, Romblon na lumagpas sa coastal easement zone na itinakda ng batas.
Ito ay base sa ilang resort owners na nakatanggap ng sulat mula di umano sa opisina ng DENR-Romblon.
Kasunod ito ng paghihigpit ng opisina ng Department of Environment and Natural Resources sa mga establishments kagaya ng resorts, hotel na lumagpas sa coastal easement zone.
Hindi pa ito kinukumpirma ng opisina ni Provincial Director Maximo Landrito ngunit ayon sa mensahe na pinadala ng DENR MIMAROPA sa Romblon News Network nitong Abril, sinabi nila na nag-utos si Regional Director Natividad Bernardino sa mga provincial director sa bawat probinsya sa MIMAROPA (Mindoro, Marinduque, Romblon, Palawan) na higpitan ang pagpapatupad sa environmental laws alinsunod sa utos ni DENR Secretary Roy Cimatu.
Nauna ng naglabas ng notice of violations ang opisina ng DENR MIMAROPA sa ilang establishments sa Puerto Galera, Oriental Mindoro, El Nido at Coron sa Palawan.
Ang crackdown sa mga lumalagpas sa coastal easement zone ay kasunod ng pagsasara sa sikat na Boracay Island.
