Hinikayat ni obstetrician-gynecologist Dr. Lilian Lim Madrona ang mga kababaihan na unahin din ang sariling kalusugan at huwag ipagpaliban ang cancer screening sa kabila ng mga responsibilidad sa pamilya, trabaho at komunidad.
Sa kaniyang mensahe sa isinagawang aktibidad para sa breast at cervical cancer awareness sa Alcantara nitong Miyerkules, Oktubre 21, binigyang-diin ni Madrona ang kampanyang “Babae, mahalaga ka. Magpa-cancer screening ka” bilang paalala na mahalagang pangalagaan ng kababaihan ang kanilang kalusugan.
Ayon kay Madrona, maraming babae ang inuuna ang pangangailangan ng kanilang mga anak, asawa at iba pang kapamilya kaya naipagpapaliban ang pagpapatingin sa doktor. May ilan din umanong hindi pinapansin ang mga sintomas dahil iniisip na kusa itong mawawala o natatakot sa posibleng matuklasan sa pagsusuri.
Binigyang-diin niya na ang pag-aalaga sa sarili ay hindi pagiging makasarili kundi isang paraan din ng pagmamahal sa pamilya.
“Ang tunay na matapang na babae ay hindi lamang marunong magtiis. Marunong din siyang humingi ng tulong at pangalagaan ang kanyang sarili,” ani Madrona.
Hinimok din niya ang mga kababaihan na magkaroon ng lakas ng loob na magtanong tungkol sa kanilang kalusugan, gumawa ng matalinong desisyon at hikayatin ang kanilang mga kaibigan at kapitbahay na magpa-screen.
Ayon kay Madrona, mahalaga ring gampanan ng mga lalaki ang kanilang papel sa pangangalaga sa kalusugan ng kababaihan sa pamamagitan ng paghikayat sa kanilang mga asawa, ina, kapatid at anak na magpatingin at pagsama sa mga ito kung kinakailangan.
Aniya, hindi lamang usapin ng kababaihan ang kanilang kalusugan kundi responsibilidad din ng buong pamilya at komunidad.
Hinimok niya ang mga dumalo na samantalahin ang mga serbisyong pangkalusugan na iniaalok ng lokal na pamahalaan ng Alcantara at ipagpatuloy ang paghikayat sa iba pang kababaihan na magpasuri.
Sa pagtatapos ng kaniyang mensahe, sinabi ni Madrona na dapat maging higit pa sa isang araw na aktibidad ang kampanya at maging isang patuloy na pagkilos upang maramdaman ng bawat babae sa Alcantara at sa buong lalawigan ng Romblon na pinahahalagahan, sinusuportahan at binibigyang-kapangyarihan silang pangalagaan ang kanilang kalusugan.
