Arestado ang isang 40-anyos na tricycle driver matapos umanong mabilhan ng hinihinalang shabu sa isinagawang buy-bust operation ng mga awtoridad sa Barangay Tulay, Odiongan, Romblon nitong gabi ng October 13.
Isinagawa ang operasyon ng Municipal Drug Enforcement Unit ng Odiongan Municipal Police Station, katuwang ang Provincial Drug Enforcement Unit ng Romblon Police Provincial Office at sa pakikipag-ugnayan sa Philippine Drug Enforcement Agency (PDEA) MIMAROPA.
Batay sa paunang ulat ng pulisya, matagal umanong isinailalim sa surveillance ang suspek bago ikinasa ang operasyon.
Nakumpiska mula sa suspek ang isang pakete ng hinihinalang shabu na nakalagay sa lagayan ng sigarilyo, ₱1,000 marked money, isang lighter at ang tricycle na ginamit sa operasyon.
Nasa kustodiya na ng Odiongan MPS ang suspek habang inihahanda ang mga kasong paglabag sa Sections 5 at 11, Article II ng Republic Act No. 9165 o Comprehensive Dangerous Drugs Act of 2002, para sa inquest proceedings.
Itinanggi naman ng suspek ang mga paratang laban sa kanya.
