Arestado ang isang 38-anyos na lalaki matapos umanong magdulot ng kaguluhan at makabasag ng salamin ng Barangay Hall sa Barangay Sugod, Cajidiocan, Romblon nitong October 6.
Ayon sa Cajidiocan Municipal Police Station (MPS), nangyari ang insidente bandang 10:30 ng umaga sa kahabaan ng National Highway.
Batay sa paunang imbestigasyon, umiinom umano ng beer ang suspek, isang magsasaka at residente ng Barangay Sugod, sa tabi ng barangay hall. Matapos uminom, tatlong beses umano nitong inihagis ang mga walang lamang bote sa kalsada, na nagdulot ng alarma at kaguluhan sa lugar.
Rumesponde ang mga barangay official at tanod na naka-duty at sinita ang suspek. Gayunman, umano’y nagalit ito, kumuha ng bato at inihagis patungo sa barangay hall.
Tumama ang bato sa salamin ng pintuan at nabasag ito. Pumasok umano sa loob ng gusali ang bato matapos mabasag ang salamin, na nagresulta sa tinatayang ₱120,000 halaga ng pinsala sa ari-arian.
Kasunod nito, inaresto ng mga rumespondeng tauhan ng Cajidiocan MPS ang suspek na kasalukuyang nasa kustodiya ng pulisya para sa dokumentasyon at kaukulang disposisyon.
Inihahanda ang mga kasong Alarms and Scandals at Malicious Mischief laban sa suspek para sa pagsasampa sa Office of the Provincial Prosecutor sa pamamagitan ng inquest proceedings.
Patuloy namang nananawagan ang Cajidiocan MPS sa publiko na panatilihin ang kapayapaan at kaayusan at iwasan ang mga gawaing maaaring magdulot ng kaguluhan o pinsala sa pampubliko at pribadong ari-arian.
