Tatlong katao ang inaresto ng mga awtoridad matapos mahuli sa umano’y iligal na pagdadala at distribusyon ng petroleum products at LPG cylinders sa karagatan ng Corcuera noong gabi ng May 4.
Ang tatlong suspek ay pawa mga residente ng Occidental at Oriental Mindoro.
Ayon sa Criminal Investigation and Detection Group (CIDG) Romblon Provincial Field Unit, nagsagawa ng operasyon ang pinagsanib na pwersa ng kanilang tanggapan, Regional Intelligence Division ng PRO MIMAROPA, Philippine Coast Guard Substation Corcuera, at Corcuera Municipal Police Station, sa koordinasyon ng Department of Energy (DOE), sa ilalim ng OPLAN LIRA at OPLAN LIGAS.
Naaresto ang mga suspek matapos ma-intercept ang kanilang sasakyang-dagat na M/B “Macky Achilles” sa layong humigit-kumulang 300 metro mula sa pampang ng Sitio Tabok, Barangay Mabini, habang pinaghihinalaang nagsasagawa ng iligal na transportasyon ng LPG at gasolina.
Sa isinagawang inspeksyon, nadiskubre ang 153 piraso ng LPG cylinders at 145 plastic containers na may lamang tinatayang 30 litro ng gasolina bawat isa. Nabigo umano ang mga suspek na magpakita ng kaukulang permit o lisensya mula sa DOE.
Kabilang sa mga nasamsam ang mga bangka, mga dokumento, LPG cylinders, at petroleum products na may kabuuang tinatayang halaga na ₱3.78 milyon.
Dadalhin sana sa mga negosyante sa isla ng Simara ang mga supply na nasabat ng kapulisan.
Nahaharap ang mga suspek sa kasong paglabag sa Batas Pambansa Blg. 33, Republic Act No. 11592 o LPG Industry Regulation Act, at Republic Act No. 8479 o Downstream Oil Industry Deregulation Act.
Kasalukuyang nasa kustodiya ng CIDG Romblon ang mga suspek habang inihahanda ang pagsasampa ng kaso laban sa kanila.
Discussion about this post