Tiniyak ni Congressman Eleandro Jesus “Budoy” Madrona ang buong suporta ng mga opisyal ng lalawigan sa mga atletang Romblomanon na lalahok sa Palarong Pambansa 2026 na gaganapin sa Agusan del Sur.
Ito ay inihayag ng kongresista sa ginanap na pamamahagi ng cash incentives para sa mga manlalarong nakakuha ng medalya sa katatapos lamang na MIMAROPA Regional Athletic Association Meet 2026.
Ayon kay Congressman Madrona, kabilang sa suportang ipagkakaloob ang karagdagang allowance para sa mga atletang lalaban sa pambansang kompetisyon.
Aniya, ang hakbang ay pagpapakita ng suporta sa mga atletang patuloy na nagbibigay ng karangalan at nagpapakilala sa lalawigan ng Romblon sa buong bansa sa larangan ng palakasan.
Ipinahayag din ng mambabatas na kasama ang mga alkalde ng iba’t ibang bayan sa lalawigan, personal silang magpapakita ng suporta sa mga atletang Romblomanon sa darating na kompetisyon.
Inaasahan na ang naturang suporta ay makatutulong upang higit na mapalakas ang paghahanda ng mga atleta na kakatawan sa Romblon sa pambansang palaro.
