Nagpapagaling ngayon sa ospital ang isang senior citizen na negosyante matapos barilin sa Barangay Mabulo, San Fernando, Romblon, gabi ng Sabado, January 17.
Ayon sa pulisya, ang biktima na kinilalang alyas “John” ay nakaupo sa labas ng isang tindahan sa tabi ng National Road nang lapitan ng suspek, isang 47-anyos na driver at residente rin ng lugar.
Batay sa imbestigasyon, tinutukan umano ng suspek ng baril ang biktima bago ito paputukan sa ulo. Bumagsak ang biktima at agad isinugod sa Sibuyan District Hospital sa Cajidiocan para sa agarang lunas.
Matapos ang insidente, tumakas ang suspek patungong Magdiwang, Romblon kung saan ito kusang sumuko sa mga awtoridad.
Hindi na narekober ang baril na ginamit sa pamamaril matapos umanong itapon ng suspek, subalit nakakuha ang pulisya ng isang basyo ng bala sa pinangyarihan ng krimen.
Ayon sa mga kamag-anak na nakausap ng biktima na nakausap ng Romblon News Network, may dati na umanong alitan ang biktima at ang suspek na posibleng naging dahilan ng pamamaril.
Nasa kustodiya na ng San Fernando Municipal Police Station ang suspek at mahaharap sa kaukulang kaso.
